خد حذرك ايصالات الامانه هتضيع حقك و الشيكات افضل – جـ 1 مستشارك القانونى

• أبريل 11, 2022
• Maichael Bessada

اصدر هيئه الرقابه الماليه قرار يحظر إستخدام إيصالات الأمانة كضمان للقروض الممنوحة من جمعيات و شركات التمويل متناهي الصغر و المتوسط و الصغير ، وأستخدام العقود بدلا من ايصالات الأمانه. و معلوم أن الجمعيات دي بدأت تنتشر بشكل كبير جدا و بيستفيد منها ملايين المصرين ، لو راجعنا لاخر احصائيه في مايو ٢٠٢١ هنجد أن تم صرف قروض تمويل مشروعات ل ٣.٣ مليون مواطن مصري بقيمه ٢١.٧ مليار جنيه ! و أكبر بنك حاليا وهو البنك الأهلي بدأ كمان يفتح فروع مخصوصه للتمويل متناهي الصغر و الصغير. – طب ايه الحكايه وليه صدر قرار زي ده ؟ قبل صدور القرار ده كان عشان تاخد قرض بتروح انت و الضامن بتاعك لمقر الجمعيه او الشركة و بتمضي إيصال أمانة بقيمه المبلغ ، أطراف إيصال الأمانه كانوا الجمعيه او الشركه المانحه للقرض و حضرتك او الضامن طرف تاني و حساب بنكي طرف تالت. إيصال الأمانه كان ضمان للقرض عشان لو مسددتش المبلغ يتم عمل محضر تبديد او تحريك جنحه مباشره لخيانه الأمانه و بالفعل ده الي كان بيحصل في عدم السداد لقيمه القرض. الأمر الفتره الي فاتت كان أنتشر و أصبح في دوائر – غالبا جنح مستأنفة – بالفعل بتدي براءات لما بتشوف بس أسم الجمعيه او الشركه المانحة للتمويل رافعه إيصال امانة للسبب ده و من غير حتي حضور محامي عن المتهم!! وقانونا المحكمه في حكمها صحيحه ١٠٠% و بتطبق صحيح القانون ، وكان ساعتها بتضطر كشركه ترفع أمر أداء مدني و تطلب ضم الجنحة و ده الي كان بياخد وقت كبير. للسبب ده قرار هيئه الرقابه الماليه مهم جدا وهو الزام الجمعيات و الشركات الي بتدي تمويل انها تعمل عقود مدنية و تمضي الضامن و العميل عليها و متاخدش اي أيصالات امانة عليهم لانها فعليا بلا اي سبب قانونا ، و أصبح في حالة الأخلال بعدم السداد هيكون الأمر امام المحكمه المدنيه وليست محكمة الجنح. مستشارك القانونى
تابعونى بإستمرار على الهاتشتاجات
#الافوكاتو
#استشارات_قانونيه
legaleducation #

legalservices#